Þjóðvegur 61

Það væri ekki leiðinlegt að aka eftir honum...

Þrjú á palli

Þeir er hafa í hyggju að stofna þjóðlagahljómsveit á borð við Þrjú á palli eru beðnir um að hafa samband við mig.

Damn, þessi hljómsveit er wicked!

Fokking meistari

Skilaboð til fjölmiðla:

Eruð þið til í að hætta að sitja á þumlunum ykkar og drullast til að hætta að tala um þetta jólastress sem á víst að tröllríða öllu þessa dagana? Ég er þess fullviss um að þessi kvilli sem þetta andskotans orð lýsir hrjáði mun færri áður en það var blásið upp í fjölmiðlum og þeir sem geta ekki hætt að væla yfir því hvað þeir eru að farast úr stressi er skipað hér með að gera það samt.

Gangtruflarnirnar

í lærdómsvélinni hafa tekið hágildi í dag. Strokkarnir hafa haldist í sömu stöðu og þeir voru í þegar slökkt var á henni síðast, kertin eru að þrotum komin, nánast fulleydd. Ósmurð vélin veldur ökumanninum þjáningum og draumar hans um sólríka sumardaga þegar biluð miðstöðin hrellir engan ágerast. Óljóst er hvernig dekk bílsins sem vélinni er ætlað að veita afl munu koma til með að spæna upp malbik vegs stærðfræðigreiningarinnar á komandi tímum. Ljóst er þó að orkuríks eldsneytis og langra hléa vélinni til handa verður þörf...

Heims um Vatnsból

Eins og einhverjir lesendur vita e.t.v. nú þegar er söfnun farin af stað fyrir vatnsbrunni Afríku til handa. Að sjálfsögðu má hver og einn ekki láta sitt eftir liggja og hef því ákveðið að afrita eftirfarandi texta af heimasíðu Henriks Garcia. Ekki yrði leiðinlegt ef einhverjir lesendur sæu sér fært að gera slíkt hið sama.


Hlýðið á fögnuð. Menn ætla að safna 120.000 krónum fyrir afar þyrsta einstaklinga. Er þetta sameiginlegt átak og er lesandi beðinn um að taka þátt.

Stiftamtmaðurinn sagði: Það er að mínu mati sláandi auglýsing í Morgunblaðinu í morgun (þriðjudag). Þar er talað um að Nýr brunnur sem getur séð 1000 manns fyrir vatni í marga áratugi kosti 120.000 kr. Það gera 2.500 kr. fyrir tæplega 50 manns samkv. auglýsingu (en 48 samkv. áreiðanlegum útreikningum). Ég veit að við erum öll fátæk, skuldug og það eru að koma jól en með samhentu átaki ætti þetta að takast léttilega. Þetta er nú á algjöru frumstigi en er vilji hjá lesendum fyrir því að auglýsa þetta á síðunni sinni og tala kannski við ættingja og vini og leggja saman í einn brunn? Er ekki smá jólafílingur yfir því að veita 1000 manns vatn í Mósambík eða Úganda? Sleppa því að panta einu sinni pizzu og safna saman fyrir einum brunni? Eða gabba ömmu og afa til að leggja málefninu lið í staðinn fyrir einhver rúmföt sem þið eigið pottþétt eftir að fá annars í jólagjöf – þá eru báðir aðilar glaðir. Þetta liggur hjá ykkur, ég er því miður ekki nógu ríkur ennþá til að standa í þessu einn, en vonandi mun þessi elíta geta gefið hvert sinn brunn í framtíðinni. Baráttu- og jólakveðja. Í barnslegri einlægni Bjarni Þór Pétursson.

Hagnaðurinn mælti:Núna hefur verið stofnaður reikningur fyrir þessa söfnun. Hugmyndin er að safna þessum 120 þús kr., prenta stóra ávísun (svona fótbolta-ávísun, þið vitið) og afhenda svo Hjálparstofnun Kirkjunnar um miðja næstu viku. Líkur eru til að biskup Íslands muni mæta við það tilefni (ekkert grín hér).

Hér er það eins og ávallt einstaklingsframtakið
sem skiptir máli. 2500 kr á mann.

Reikningsupplýsingar:
0101-05-267703
Kt. 100179-3189

Fylgjast má með stöðunni á
www.haukurhauks.blogspot.com
Þá eru síðueigendur hvattir til þess
að birta fögnuðinn á síðunni sinni.
Takk fyrir, Henrik G. G.

Draumfarir

Formáli: Þeim lesendum er ekki hafa lagt stund á nám í algebru og hnitarúmfræði til fróðleiks eru þverstæðir vigrar hornréttir hver á annan. Þeir hinir sömu eru vinsamlegast beðnir um að hringja ekki á menn í hvítum sloppum til að fjarlægja mig).

Að þessum formála rituðum langar mig til að gefa út þá ályktun að þegar námsmanni dreymir að hann sé staddur á karlaklósetti Aðalbyggingar Háskóla Íslands (sem vel á minnst er ekki til síðast þegar ég athugaði) og þar fer fram umræða um það hvort að Hemmi Gunn sé þverstæður hefur hann líklegast lært nóg fyrir algebruprófið. Að því ályktuðu ætla ég rétt að vona að mér gangi vel á eftir, ég vil ómögulega vita hvað annað getur valdið þvílíkum draumum...

Jöbbs

Það þyrfti ekkert að snúa upp á höndina á mér til að láta mig sjúga spena Heiðrúnar núna...

Svefnvandræði

Er ég sá eini eða eru einhverjir fleira þarna úti sem eiga bágt með að sofna eftir að þeir eru nýbúnir að hlusta á lag í valstakti?

Nei Sveppi, nei!

/*
Af einhverjum óskiljanlegum ástæðum eyddist þessi færsla út og því miður öll kommentin með henni. Sem betur fer átti ég hana þau vistaða á traustum stað og því munu spellvirki Ofur-Huga, Simma og Jóa ekki hafa jafnmikil áhrif og ætla mætti í fyrstu.
*/

Eins og flestir hafa líklegast tekið eftir stendur stífur próflestur nú yfir hjá nemum Háskólans. Ýmsar skoðanir eru á því hvort að aumir stúdentar geti leyft sér að taka forskot á jólasæluna og lagt eyru sín við hlustir þegar jólalög berast á öldum ljósvakans til þeirra, en fyrir minn smekk skaðar eitt og eitt jólalag engan, ásamt freyðandi malt og appelsín blöndu og jafnvel smákökum líka.

Það var áðan.

Í aumkunnarverðri tilraun til að stinga próflesturinn af stóð ég upp frá tölvunni og hét för minni fram í eldhús nú fyrir skömmu. Þegar þangað kom inn var eins og venja ber kveikt á útvarpinu, Rás 2 ef nánar er tiltekið. Ég var ekki fyrr kominn inn um dyrnar áður en ljúfir upphafstónar eins af mínum uppáhaldsjólalögum ollu þrýstingsbreytingu við hljóðhimnu mína (jájá, ég er að fara í eðlisfræðipróf á morgun, mér er sama hversu asnalega þetta hljómar) og á svipstundu gleymdi ég öllum raunum Throckmortons frænda míns á eðlisfræðisviðinu og jólatilhlökkun festi klær sínar í sálartetrinu. Þetta sæluástand varði þó ekki lengi, því innan skamms rak ég mig á að eitthvað var ekki eins og vera. Jújú, laglínan var sú sama, og ég fékk ekki betur heyrt en að hljóðfæraleikurinn var áþekkur þeim er ég kannaðist við, þannig að hið eina sem eftir stóð vafasamt var söngurinn.

Eins og gleggstu lesendur hafa ef til vill kveikt á tilheyrði laglínan jólalaginu geðþekka Snow Is Falling sem löngum hefur létt lund mína, hvort heldur sem er í upprunalegu útgáfunni eða þá undir heitinu Snjókorn falla í flutningi Ladda. Þetta var hins vegar hvorugt. Í staðinn barði hlustir mínar óhljóð þau er helst mætti ætla að ættuð væru úr helvíti, þvílíka áþján óska ég engum manni að upplifa. Með snarræði tókst mér að stökkva að útvarpinu og rjúfa straum til þess og bjarga þar með hljóðhimnu minni en tíminn sem var til stefnu áður en blæða tók úr henni var teljandi í sekúndubrotum á báðum höndum einhents manns.

Jæja, þá eru líklegast allir búnir að fatta hvaða óskapnaði ég varð vitni að rétt í þessu. Enginn annar en sjónvarpsstjarna ársins fyrir nokkrum árum var hér búinn að taka eitt af skemmtilegri jólalögunum í sögu þeirra og klæmast á því svo eftir varð tekið. Einhver virðist hafa dáið og gert konung íslenskar afþreyingar (að kapteini Flygering undanskyldum að sjálfsögðu) að söngstjörnu án þess að hvorki kóngur né prestur væri spurður. Einhver ætti að segja umræddum manni, sem að sjálfsögðu er enginn annar en Sveppi, að halda sig við það sem honum fer best. Af einskærri góðmennsku minni hef ég ákveðið að taka það hlutverk að mér og segi því við Sveppa (sem ég geri fastlega ráð fyrir að lesi þetta blogg):

Sveppi. Haltu áfram að gera það sem þú gerir best. Í stað þess að syngja skaltu pissa á þig.



Í veikri von um að sættast við tilveruna rauk ég því í tölvuna á nýjan leik, skrifaði þessa færslu og setti tímamótaverkið Kósý Jól á. Það virðist hafa tekist...

Smáauglýsingar

Ég auglýsi hér með eftir einbeitingu og sjálfsaga, mega vera notuð en þurfa helst að virka.

Hairdoctor

Afsakið að ég spyrji...

en hvað er fokking málið með þetta hæp?

Það er á tímum sem þessum þegar maður leyfir sér að álykta að tónlistarheimurinn hafi tekið hraðbyra stefnu niður á við sem ekki sér fyrir endann á, nákvæmlega 25 árum áður en þetta er ritað...

Hið eina sem hægt er að gera í stöðunni er að setja verk Meistarans annað hvort undir nálina eða yfir geislann, og finna fróun í því að eftir 25 ár mun enginn minnast útgáfuafmælis alls þess sora sem tröllríður íslensku tónlistarsamfélagi nú á dögum. Þess í stað verður minnst með sorg í hjarta að 50 ár eru síðan að blómagarður vestrænnar dægurtónlistar varð síns fegursta blóms fátækari.

Spekfeitt

Það gerist ekki mikið feitara en eðalplötur með Bob Marley á vínyl í góðum græjum...

Pælingar

Ég hef aldrei náð þeirri pælingu að pirra nágranna sína með því að spila jólalög á hljóðfæri...

Desire

Ekki einatt er platan Desire með Bob Dylan sígilt meistaraverk heldur er nafn hennar hið fegursta er ég veit um á nokkurri plötu.

Klukkan er eitt, nú verða sagðar veðurfréttir

Það er einhver nánast ólýsanleg notaleg tilfinning sem grípur um sig í manni þegar maður hlustar á veðurfréttir eftir miðnætti...

Á Þakkargjörðardeginum 2005

Ég bý hér með öllum lesendum þessarar síðu til Þakkargjörðarkvöldverðar í kvöld. Boðið verður upp á smjörfylltan kalkún, trönuberjasósu og maukaðar kartöflur að ógleymdri graskersböku með rjóma í eftirrétt.

Ég vona að þið komið öll og fagnið með mér þessum merka degi í sögu þjóðarinnar!

Dúndrandi

diskótaktur fyllir herbergið og berst út á götu. Þá vita gangandi vegfarandur að hinum megin við gardínurnar situr Ásgeir og leysir skilaverkefni í eðlisfræði...

Þetta

hérna er það sniðugasta sem ég hef séð síðustu vikur og verður án efa pantað til landsins á næstu dögum...

Mikið

lifandi skelfingar ósköp er gaman
að vera svolítið hífaður.

Nú væri réttast

að fara út og draga tilbúna skýrslu mína að húni næstu flaggstangar og fara svo að sofa. Skynsemi hefur hins vegar ekki einkennt svefnvenjur mínar hingað til og því er réttast að fara að skoða göngustafi á ebay.com. Þess á milli má svo alltaf skoða skemmtilegar myndasögur á borð við þessa:

Síðasti bardaginn

Hermenn eru aðframkomnir að þreytu. Svo dögum saman hafa tvær fylkingar háð blóðuga baráttu sín á milli og nú er að duga eða drepast fyrir báða aðila. Í nótt mun lokaorustan fara fram. Áður en dagur rís mun önnur fylkingin rita nafn sitt á spjöld sögunnar en hin mun lúta í grasið og nafn hennar hverfur eins og döggin sem fylgir næsta morgni fyrir sólu. Skotfæri beggja bóga eru á þrotum og hvíldarlausir hermennirnir skríða meðfram jörðinni og tína upp allt sem nothæft er af líkum félaga sinna. Sum bestu ungmenna landsins munu hér láta lífið en önnur snúa heim sem hetjur.

Nú heyrast herlúðrar þeyttir. Í fjarska má greina að síðasta kókdósin hefur verið opnuð. Eðlisfræðifræðiskýrsluritarar þeysast fram á ritvöllinn. Nú er að duga eða drepast...

Mikið andskoti

er hann Bob Dylan góður. Bootleg diskarnir hans sem hafa verið að laumast út á almennan markað síðustu árin eru með því betra sem eyru mín hafa fengið að njóta síðustu mánuði.

Hugrennsli

Núna er klukkan 16:51 skv. mínum mælingum. Götuljósin eru fyrir löngu tekin aftur til starfa eftir stutta hvíld sem þau fengu meðan enn lifði ljóstýra frá sólu á landinu og langt er síðan að rökkrið náði yfirhöndinni í sífelldri baráttu dags og nætur. Ég er búinn að eyða drjúgum hluta helgarinnar í skrif eðlisfræðiskýrslu og útlit er fyrir að haldið verði áfram eitthvað inn í nóttina. Nú rétt í þessu mátti heyra himnana falla og steypidemba barði réttláta sem rangláta hér fyrir utan gluggann. Ég kann ekki að meta þetta...

Jólagjöfin í ár?

Það væri nú ekki amalegt að eiga eins og einn svona göngustaf:

Slíkir göngustafir bjóða upp á ómælanlegar ánægjustundir við það að eitt að pota í fólk með sér, nauðsynlegt að hafa til að dreifa huganum frá prófaundirbúningi og öðrum þjáningum sem hinn önnum kafni námsmaður þarf að ganga í gegnum...

Munaður

Líklegast játa flestir lesendur þessarar færslu því að hafa e-n tímann á lífsleiðinni fengið sér sopa af gleðidrykknum Kóka-Kóla (eða Coca-Cola eins og þeir skrifa er gorta sig af ágætri þekkingu á enskri tungu). Sjálfur nýt ég þess oft að láta sykurinn leika um æðar mínar en upp á síðkastið hef ég bryddað upp á þeirri nýbreytni að skera eins og eina sítrónusneið og bæta út í löginn. Hvet ég alla þá er vantar ef til vill smá krydd í grámóðu hversdagsleikans eindregið til að leika þetta eftir, það er löngu kominn tími á að einokun veitingahúsa á að láta sítrónusneiðar fylgja hverju keyptu kókglasi linni.

Við skýrslugerð

Líklegast er það draumur fárra að eyða laugardagskvöldi í skýrslugerð í eðlisfræði. Þá er aðeins eitt í stöðunni, nefnilega það að hlusta á blússandi 80's tónlist. Sem er einmitt það sem ég er að gera núna...

Artí-Ásgeir

Síðastliðna tvo daga hefi ég gert tvo mjög artí hluti.

Annars vegar pantaði ég mér diska af amazon.com sem voru sjúkt indí og töff.

Ef að ég væri hálfviti eins og svo mörg gimp sem að halda að þau séu sjúkt indí mundi ég hér koma með listann yfir þær plötur sem ég pantaði. Hver sá er læsi þessa síðu mundi falla í stafi yfir mikilfengleikanum og tilbiðja mig sem indíguð, því jú, ég væri svo sjúkt indí.

Eða ekki.

Allavega. Í það minnsta tel ég sjálfan mig ekki vera hálfvita (það væri nú nokkuð slæmt ef maður væri sjálfur viss á því) og því vil ég forðast að gera hluti sem ég skilgreini sem hálfvitalega. Ég ætla því alfarið að sleppa því að nefna hvaða diska ég keypti, mér nægir að eiga það fyrir sjálfan mig en þið megið þó vita það að ég er helvíti sáttur við valið. Ef e-r þarna úti er hins vegar mjög áhugasamur um hvaða diskar urðu fyrir valinu er sjálfsagt fyrir þann hinn sama að panta hjá mér viðtalstíma, ég ætti að vera laus e-n tímann á vormisseri 2007.

Nú er ég búinn að eyða e-m mínútum í tilgangslaust raus sem öllum er sama um. Þeir sem hafa e-ð við það að athuga geta hoppað upp í stað þar sem sólin aldrei skín, þ.e. Ísland um þessar mundir.

Talandi um sólina. Er þetta veður hérna e-ð djók? Samfelldu þriggja ári hlýindaskeiði lokið, einmitt meðan að ég er á landinu. Ég er farinn út á bílastæði að ræsa bílinn til að hafa hann í gangi yfir nóttina, það skiptir máli að hver og einn leggi sitt fram við að gera veg gróðurhúsaáhrifanna sem mestan. Þetta er ekki það sem að hipparnir lofuðu mér þegar þeir héldu fundinn á kommúnunni sem ég bjó á um umhverfismál.


Hinn artíhluturinn sem ég gerði var að ég mætti á ljóðakvöld áðan á Café Rósenberg. Því miður voru skæruliðarnir í S-Ameríku ennþá með alpahúfuna mína en dökku sólgleraugun mín gat ég notað sem betur fer. Ég saknaði Megasar þó sárlega á þessu kvöldi en þar las Henrik Garcia, bróðir Andy Garcia leikara, upp úr eigin ljóðum.

Nú er ég búinn að eyða enn fleiri mínútum í tilgangslaust raus sem öllum er sama um. Mál er að linni. Nú mun hún sökkva.

Tilhlökkun

Ohhh hvað ég get ekki beðið eftir næsta sunnudagskvöldi, að sjá í hvaða ævintýrum Kalli og læknaneminn lenda næst í með þvottavélina hennar Möggu er það sem gefur lífi mínu gildi! Ef ekki væri fyrir Kalla Café væri líkaminn á hraðri leið niður af Golden Gate brúnni þessa stundina, en sálin þegar glötuð tilgangsleysi lífsins.

Jebbs

Ekki laust við að maður sé orðinn tvítugur...

Að loknu prófkjöri

Öllum að óvörum kom í ljós í gærkvöldi að vinur einkabílsins, Eggert Páll, náði ekki inn á lista 15 efstu manna í prófkjöri Sjálfstæðisflokksins í gær og í fyrradag. Til að reyna að létta lund hryggra lesenda hef ég því ákveðið að birta hér á síðunni póst sem ég sendi Eggert Páli [sic] síðastliðinn þriðjudag.

"
Sæll og blessaður!

Okkur félagana langar endilega til að kíkja til þín í kaffi í
kosningamiðstöðinni e-n tímann á góðri stund áður en væntanlegt prófkjör
fer fram. Í okkur ólgar þrá um að fræðast um stefnumál þín auk þess sem
löngun eftir því að komast hver maðurinn á bakvið hinn margrómaða Eggert
Pál er í raun og veru blundar í okkur öllum. Það væri því óskandi að þú
gætir séð þér fært um að svara mér til baka hvenær þú munt heiðra
kosningaskrifstofuna með nærveru þinni svo við getum komið heimsókn til
þín inn í þéttskipaða stundaskrá hins önnum þjakaða háskólastúdents.

Með von um góð viðbrögð,
Ásgeir
"

Eins og frægt er orðið varð það úr að við fórum í heimsókn til hans síðastliðinn fimmtudag og veitti hann okkur þar sælgæti eins og höfðingjum einum er lagið. Nú geta aðdáendur hans einungis vonað að hann láti mótlætið ekki á sig fá heldur komi tvíefldur til leiks inn í baráttuna að fjórum árum liðnum.

Seisei nei

Það eru ekki allir sem geta sagst vera vinir vinar einkabílsins, óneiónei...

Það er nú ekki oft...

...sem mér finnst fólk hafa átt skilið að vera skotið en þessir komast ansi nálægt því...

Met

Nú veit ég ekki hvort að búið var að finna hugtakið pólítísk rétthugsun hafi verið fundið upp árið 1972 þegar John Lennon gaf út lagið Women Is the Nigger of the World. Hins vegar er öruggt að ef svo var setti hann met sem seint verður slegið í að virða hana að vettugi...

Hættið nú alveg.

Plís.

Þið gimp þarna úti sem eruð að bjóða ykkur fram í prófkjörinu til setu á borgarstjórnakosningalista Sjálfstæðisflokksins vinsamlegast takið eftirfarandi til ykkar. Þetta er ekki fyndið lengur. Þetta er orðið sorglegt. Hættið áður en einhver stekkur fram af Hallgrímskirkjuturni vegna aulahrolls út af ykkur.

Plís.

(Hérna gæti ég komið með langan lista yfir heimasíður framboðsgimpa en ákvað að sleppa því þar sem það á við nærri alla sem bjóða sig fram og enginn mundi nenna að lesa hann yfir)

Á Kvenréttindadeginum 2005

Eins og alþjóð veit líklegast fékk ég ásamt afgangi Skólafélagsstjórnar rektorsáminningu í fyrra fyrir nokkuð sem ég taldi (og tel reyndar enn) óverðskuldaða. Ég vil þakka þeim aðilum kærlega sem komu því til leiðar að þessar áminningar voru veittar okkur kærlega fyrir að meina mér og Vilhjálmi Alvari ekki þáttöku á baráttufundinum á Ingólfstorgi áðan, þessir úthrópuðu karlrembupungar sem við höfum lengi verið þekktir sem...

Jafnframt óska ég öllum kvenkyns lesendum (og hinum karlkyns að sjálfsögðu líka (og meira að segja hinum hvorugkyns einnig (og öllum öðrum bara líka))) til hamingju með Kvenréttindadaginn og vona að það verði ekki þörf á að halda annan svona baráttufund árið 2035.


P.S. Talandi um kvenréttindi. Það er sérhverri stúlku heiður (og jafnvel sjálfsögð kvenréttindi) að komast í kynni við eðalmenn, sjarmöra og glaumgosa á borð við Vilhjálm Alvar og Sigurjón Norberg Kjærnested. Það er því með mikilli gleði í hjarta að ég býð velkomna fram á ritvöllinn Vilhjálm og Sigurjón ásamt Huldu munu sjá um að trylla lýðinn á komandi árum og áratugum.

Ný sjónvarpsstjarna fædd?

/*
Helvítis blogger var bilaður í allan gærdag, ég nenni hins vegar ekki að lesa yfir tímasetningar en þessi færsla á við laugardagskvöld.
*/

Í gegnum tíðina hafa atkvæði manna oft verið keypt á ódýran hátt með fríum
veitingum, og þá helst þeim er renna undan spenum Heiðrúnar í stríðum straumum.
Gísli Marteinn ákvað að reyna að leika þennan leik sem oft hefur reynst vel í
gærkvöldi og til að koma í veg fyrir að óharðnaðar sálir mundu láta blekkjast ákvað
ég að fórna mér og drekka í boði Gísla. Með því kom ég vonandi í veg fyrir að
einhver óstaðfastur fórnaði sínu atkvæði á altari Bakkusar, en áfengið sem ég og
nokkrir aðrir góðir menn innbyrtum hefði örugglega nægt í nokkur atkvæði.

Eftir þessa hetjudáð var ákveðið að halda á tónleika Bang Gang á Nasa en þegar á
Austurvöll var komið kom í ljós að röðin náði út að Alþingi. Óverandi
fæðingarhálfviti var fljótt tekin ákvörðun um að breyta áætlun kvöldsins og stefnan
þess í stað tekin á Hafnarhúsið þar sem rétt svo náðist í skottið á Jeff Who?. Að
sjálfsögðu náðum við partýlaginu, en skv. lögum og reglum Jeff Who? mega þeir víst
ekki spila það án þess að ég og Hlynur nokkur Grétarsson séu viðstaddir.

Nú, eftir að hafa skemmt okkur konunglega yfir partýlaginu (sem heitir réttu nafni
Barfly, en það er annað mál) ákváðum við að halda aftur í hetjuleiðangur til Gísla
og drekka nokkur atkvæði og var samansafnið af stórhættulegum frjálshyggjuplebbum
orðið gríðarlega umfangsmikið. Eftir að hafa hrært upp steypu í nokkrum þannig með
hugmyndum um stofnun fyrirtækis til að opna bjórflöskur (sem fékk miklar undirtektir
frá þeim er hana heyrðu) var haldið aftur í Hafnarhúsið á aðalnúmer kvöldsins, The
Zutons.

// Innskot: Nú er ég að fatta að þetta er dagbókarfærsla, held samt að ég haldi
áfram en bið alla þá er hafa móðgast afsökunar.

Allavega. Meðan að við Hlynur vorum að bíða eftir að Zutons mundu stíga á svið vatt
upp að okkur sér maður með sítt grátt hár. Í eftirdragi var hann svo með
myndatökumann með risastóra myndbandsvél. Frá því að ég hugsaði með mér "vá hvað það
væri fyndið ef hann mundi nú vilja taka viðtal við okkur" og þangað til hann bar upp
spurninguna "So guys, can I interview you" liðu ekki nema nokkur andartök og það
varð úr. Eftir að hafa látið upp úr mér e-a mestu þvælu í manna minnum (sem hljómaði
samt frekar trúanlega held ég, m.a. um að ég hefði farið á allar hátíðirnar og að
það að til væri gott reggí á Íslandi væri eins og belja á svelli (cow on ice að
sjálfsögðu) kom á daginn að mennirnir væru frá danska sjónvarpinu og væru að gera
heimildaþátt um Airwaves. Síðan skammaði ég þá fyrir að taka ekki viðtal við okkur á
dönsku, enda held ég að danski hreimurinn minn sé enn fagurri þeim enska. Eftir
nokkurra mínútna spjall á dönsku um Kim Larsen og álíka gleði tókust menn í hendur
og þökkuðu hver öðrum fyrir, að dönsku að sjálfsögðu. Ég hvet því alla lesendur
síðunnar úti í Danaveldi (sem skv. síðustu talningu hlaupa á þúsundum) sem og alla
þá sem njóta þess að vera með danska sjónvarpið á breiðbandi að fylgjast grannt með,
álíka vitleysu hef ég sjaldan tekið þátt í.

Skilaboð

Nú þegar eitt kvöld er eftir af Iceland Airwaves get ég ekki lengur orða bundist. Nú voru skv. upplýsingum frá Hr. Örlygi, skipuleggjanda hátíðarinnar, seld um 3000 armbönd á hátíðina. Af þessum 3000 armböndum má gróflega gera ráð fyrir að um 1500 hafa ratað á hendur útlendinga (ef eftirfarandi skilaboð eiga við þá, þá er ljóst að þeir eru þegar sokknir of djúpt) og venjulegra tónlistarunnanda.

Hinir 1500 gestirnir eru líklegast að hugsa akkúrat á þessari stundu:
"Úúúú, ég er svo indí, takið mig alvarlega, úúúú"

Við þetta fólk hef ég eftirfarandi að segja:
"Haldið fokking kjafti"


Ég mun þola þetta lið eina nótt í viðbót, en guð hjálpi mér ef ég sé eina helvítis manneskju með asnalega klippingu eftir að Airwaves lýkur, ég á eftir að missa mig...

Spörrer

Veit einhver þarna úti hvað varð um hina stórmerkilegu hljómsveit Buttercup?

Ályktun

Ég sendi hér með frá mér eftirfarandi ályktun: Til eru fræ er óskaplega fallegt lag...

Ljúft

Fátt veitir manni meiri friðsæld en að segja nei þegar Gallup spyr mann hvort að þeir megi leggja fyrir mann nokkrar spurningar. Það gerði ég nú rétt áðan. Engin ástæða til að leyfa þessu liði að eyða tíma manns í e-a vitleysu...

Hörð barátta

Í dag hafa Pink Floyd og Sigur Rós háð harða baráttu um hvor hljómsveitin hafi gert betri tónlist til að hlusta á í þynnku.

Einhver með skoðun þarna úti hver standi uppi sem sigurvegari?

Sælar!

Ég vara lesendur eindregið við því að blanda saman rauðvíni, hvítvíni, absinth, bjór og Hot'n Sweet á sama kvöldinu. Ég veit til þess að það endaði illa hjá sumum í gærkvöldi...

Pakk

Í gær, sunnudag, hét ég för minni upp í geisladiskamarkaðinn í Perlunni. Sjaldan eða aldrei hafa hugmyndir Nietzsches um ofurmennið hlotið sterkari hljómgrunn í huga mínum en einmitt á þeim tíma sem ég eyddi þarna inni. Þarna var samankomið, vona ég í það minnsta, allt pakk landsins, og fyrir mig sem eyðir tíma mínum í að umgangast fólk eins og ykkur kæru lesendur var þetta vægast sagt óþægilegt. Plebbisminn var yfirgengilegur og margoft langaði mig að fara að fordæmi Megasar og afsaka mig meðan ég ældi.

Karlmaður á þrítugsaldri tók svo að sér að bíta höfuðið af skömminni fyrir aðra viðskiptavini plötumarkaðarins (að mér undanskildum, að sjálfsögðu (hógværðin uppmáluð, ætíð)) þegar hann sagði hárri röddi er hann stóð við hliðina á mér í B diskunum: "Nei sko, BON JOVI!!!". Svona lið er bara að biðja um að verða kýlt...

Eins og sagt var um Hannes Hafstein

Hún drepur fólk með glæsimennskunni...

Met...

... í fáránleika var líklegast slegið áðan þegar upp rann fyrir mér að ég fæ iðulega illt í eyrun þegar ég borða pistasíuhnetur. Ef þetta er ekki skrítið þá veit ég ekki hvað...

Lát...

...undan hópþrýstingi hefur átt sér stað og ég hef loksins látið undan þessu klukkunarbrjálæði sem gripið hefur íslensku þjóðina síðustu vikur. Ástandið var orðið þannig að ég gat ekki gengið óáreittur um ganga skólans né reynt að læra án þess að vera sífellt truflaður af æstum skríl sem þrýsti á mig að láta undan. Þar sem fyrirséð var að þetta mundi hafa skaðvænleg áhrif á einkunnir mínar á þessu misseri hef ég því ákveðið að láta undan og birta hér með fimm klukkunaratriði:

1. Í raun og veru hef ég ekki hugmynd um hvað mig langar að halda áfram að læra og hef ég þjáðst af óákveðni í þeim málum svo mánuðum skiptir. Mig langar að leggja stund á flestar tegundir verkfræði auk eðlisfræðinnar (og einnig stærðfræðinnar) sem ég nota tíma minn í núna og á sérhverjum degi fæ ég nýjar grillur í kollinn um hvað mig langar mest til að gera.

2. Forgangsröðum á verkefnum hjá mér er sjálfum mér óskiljanleg og hef ég gefist upp fyrir að reyna að ná e-m botni í hana. Þannig tók mig t.d. tvö og hálft ár til að ljúka við að mála herbergið mitt til þess eins að ég sé fram á að jafnlangur tími líði þangað til að ég eigi eftir að taka í því aftur (reyndar eru þetta nokkrar ýkjur, en ef ég held áfram að eyða tíma mínum í svona vitleysu held ég að þetta verði ágæt nálgun hjá mér...).

3. Ég man þann dag líkt og hann hefði gerst í gær sem ég keypti mér Sgt. Peppers Lonely Hearts Club plötuna (geisladiskinn reyndar, en það er ekki jafnrómantískst). Allt niður í smæstu smáatriði er tryggilega húðflúrað í huga minn, jafnvel fáránlegustu hlutir eins og það hvað ég borðaði í hádegismat.

4. Það eina sem ég eyði meiri tíma í á daginn en að læra er að hlusta á tónlist og á þessari stundu dettur mér í fátt í hug sem ég hef jafnmikið eða meira yndi af. Það að uppgötva og hlusta á nýja listamenn (og gamla að sjálfsögðu líka) er eitt af því sem gefur lífinu gildi sem. Í raun ætti það að vera öllum nokkur ráðgáta þar sem tónlist er í raun og veru ekkert annað en óhlutbundin sköpun annarra sem á sér í reynd enga fyrirmynd í neinu og það að hún geti valdið með fólki slíkar tilfinningar er eitthvað sem gaman er að velta sér upp úr. En það er önnur saga.

5. Oftast þegar ég finn fyrir þreytu í skólanum velti ég því mikið fyrir mér hvort borgi sig nú frekar að leggja sig þegar ég kem heim og læra eftir góða kríu eða drífa sig að læra og fara svo snemma að sofa. Í reynd veit ég ekki hvers vegna ég velti mér upp úr svona því ég hef fyrir löngu lært að lifa með því að ég á hvorugt eftir að gera, þess í stað á ég eftir að fara heim í tölvuna, láta frá mér einhverja svona vitleysu, læra svo langt fram á nótt og mæta þreyttur aftur í skólann daginn eftir.


Vona að þetta nægi til þess að ég fái frið í einkalifinu aftur, allavega sé ég á þessum skrifum að ég ætti að fara að taka til...

Til að taka svo þátt í þessari klukkgeðveiki munu eftirtaldir aðilar nú fá að þjást:

Grettir

Guðmundur Friðrik

Henrik Geir

Hildur

Skytturnar fimm

Jæja

Ok, ég viðurkenni það.

Það var ég sem kom þessum tölvupóstum frá Jónínu til Fréttablaðsins...


P.s. ég er að vinna í þessum klukkmálum...

Helvítis

Mannskemmandi heimadæmi...

Guði sé lof fyrir Johnny Cash á stundum eins og þessum...

Smá misskilngingur

Eftir að hafa lifað í misskilningi í allt sumar hef ég loksins sætt mig við það að það eru ekki Strumparnir sem slógu í gegn með laginu Lonely heldur bara e-r annar gaur. Fullkomin endurkoma Strumpanna í huga mínum var því á sandi byggð...



Meðfylgjandi er myndræn skýring fyrir þá sem féllu í sömu gryfju og ég...


≠

Fullkominn endir...

...á góðu djammi er að vakna og finna fyrir stóra, kalda, tveggja lítra kók inni í ísskáp. Sem er einmitt það sem ég gerði rétt í þessu. Ljúft.

Annars var haldið í ansi hreint hressilega vísindaferð í gær sem endaði með því að ferðalangar rúlluðu sér eftir gólfinu út. Klukkan sjö um kvöldið. Olli það því að ég sannfærðist enn frekar að íslenska leiðin til að djamma er einkar heimskuleg, það að fara niður í bæ klukkan tvö að nóttu og hanga þar til sex að morgni er álíka gáfulegt og e-ð sem er mjög heimskulegt. Þess í stað voru nú allir komnir niður í bæ klukkan hálfellefu (margir jafnvel fyrr) og fólk komið upp í rúm ekki seinna en þrjú hálffjögur. Og svo var vaknað klukkan 10 í morgun og farið að reikna. Eða ekki...


Nýju föt keisarans afhjúpuð: Ólíver sökkar, asnaðist loksins inn á hann í gær og geri það líklegast aldrei aftur...

Til þeirra er málið varða

Þeir sem vilja vita hvernig það er að hafa talað við Mercury verðlaunahafa...


...geta fengið að vita það hjá mér.

Þakkir

Ég ætla að þakka þér óþekkti maður sem splæsti Grjónagrautsskoti á mig, Harald, Friðrik og Hermann á Ara í Ögri í gær.

Grjónagrautsskot eru helvíti góð fyrir þá sem ekki vissu...


Kosningaloforð 2: Ef ég næ kjöri sem formaður Sjálfstæðisflokksins hyggst ég koma því í lög að áfengisskattur verður felldur niður á það áfengi sem
áætlað er að nota á flokksskemtunum. Þegar fría áfengið rennur til þurrðar í partýunum sem ég ætla að halda (sem á að sjálfsögðu aðeins eftir að gerast í undantekningatilfellum, ætíð verður nóg af fríu áfengi keypt) verður því hægt að kaupa bjórinn á 50 kall, þökk sé Flokknum.

Kosningaloforð

Þó að enn séu nokkrar vikur í fyrirhugaðan landsfund Sjálfstæðisflokksins hef ég engu að síður hafið kosningabaráttu mína og ætla að birta kosningaloforð hér á síðunni jafnt og þétt eftir því sem nær dregur kosningum. Það er því ekki úr vegi að gauka að eins og einu góðu loforði, en ef ég næ kjöri lofa ég...

Fullt, fullt af bjórkvöldum fyrir alla sem eru í flokknum! Ásamt geðveikum böllum og sjúku stemmói!

Spurning

Einhverjir fleiri en ég sem eru að pæla í að bjóða sig fram til formanns á næsta landsfundi Sjálfstæðismanna svona upp á flippið?

Pólitík

Mikið hefur nú verið skeggrætt um framboð Gísla Marteins í efsta sæti í komandi prófkjöri Sjálfstæðismanna og sýnist sitt hverjum. Ljóst er að skelfing hefur gripið um sig í brjósti þeirra flokka er áður stóðu að Reykjavíkurlistanum enda ekki heiglum hent að etja kappi við jafnvinsælan og frægan einstakling og Gísli Marteinn hlýtur að teljast. Eldri borgarar þeir sem ekki eiga eftir að gefa honum atkvæði sitt í borgarstjórnarkosningunum ef hann sigrar prófkjörið sem allar líkur benda til, enda býr Vilhjálmur Þ. Vilhjálmsson yfir álíka kjörþokka og brotinn múrsteinn, eru teljandi á fingrum annarrar handar manns sem missti þrjá fingur í vinnuslysi auk þess sem að gegnsýrðir sjónvarpsáhorfendur af yngstu kynslóð kjósandi eiga eftir að kjósa síbrosandi fíflið sem áreitt hefur augu þeirra trekk í trekk síðastliðna misseri.

Víst má telja að vinstrimenn þurfa nýjar áherslur ef þeir ætla sér að eiga roð í Gísla og glottið hans og vil ég því koma með eftirfarandi ábendingar handa þeim sem eru í innstu koppum stjórnmálaflokka og lesa þetta blogg:

*Samfylkingin: Dagurinn sem að nokkur heilvita maður mun kjósa Steinunni Valdísi eða Stefán Jón sem borgarstjóra verður dagurinn sem að Logi Bergmann hermir eftir fatavali Vilhjálms Alvars en ekki öfugt. Það er meiri skortur á kjörþokka samankominn í þeim tveimur en öllum samansöfnuðum brauðskorti í sögu Sovétríkjanna. Nei nei nei, þetta mun aldrei ganga. Það er aðeins einn maður sem býr yfir því sem þarf til að sigra Gísla Martein og ég veit hver það er. Af einstakri miskunnarsemi ætla ég að deila með lesendum hver sá maður er, en það er að sjálfsögðu enginn annar en....


HEMMI GUNN!

Ljóst er að sérhverjum stjórnmálaflokki er mikill fengur í sjálfum keisara íslenskrar afþreyingar og munu fleiri mæta á sérhvern kosningafund með Hemma Gunn en á tónleika Metallica á sínum tíma. Hemmi á margt góðra vina sem gætu hjálpað honum í kosningabaráttunni, Rúnar Júl gæti mætt sem leynigestur með bassann sinn og Dengsi gæti komið og gefið börnunum sælgæti. Gleði og glens mun skína af stefnuskrá Samfylkingarinnar og þegar Hemmi næði kjöri sem borgarstjóri mun hann ná fram einstaklega góðum samningum við ríkisstjórnina um skiptingu tekna enda alþekkt að enginn getur sagt nei við hlátrinum hans Hemma. Sérhverjum borgarstjórnarfundi mundi svo ljúka á því að Hemmi kæmi með kveðjuna frægu, "Verið hress, ekkert stress, bless" og útvarp borgarstjórn mundi bola öllum öðrum útvarpsstöðvum af vinsældarlistum. Hreint með ólíkindum er að enginn hafi komið fram á opinberum vettvangi og viðrað þessa hugmynd og hygg ég á að senda hana til fjölmiðla við fyrsta tækifæri.


*Vinstri Grænir: Sorrý Árni, en þetta er ekki að fara að ganga. Hér þarf virkilega á að halda mönnum sem kunna að kitla hláturtaugarnar því að stefnumálin gera það sjaldnast. Sprelligosa er þörf og það hina einu sönnu...



RADÍUSBRÆÐUR
(Því miður fann ég ekki mynd af Davíði Þór Jónssyni, þess í stað setti ég inn mynd af bjór eins og glöggir lesendur hafa vonandi tekið eftir...)

...munu svara kallinu. Meðlimir Radíusbræðra hafa sýnt það að þeir eru ábyrgir þjóðfélagsþegnar og Davíð Þór Jónsson getur kjaftað hvern sem er til án þess að hafa mikið fyrir því. Auk þess prýðir höfuð Steins Ármanns mikið rautt hár sem aldrei hefur verið talinn löstur á gallhörðum vinstrimönnum og því eru Radíusbræðurnir augljós kostur fyrir flokk sem þarf að sanna sig í næstu kosningum.


Framsóknarflokkurinn: Við þessu síðasta vígi bændamenningarinnar á Íslandi blasir ekkert við nema dauði ef ekki verður gripið til aðgerða skjótt. Frekar mundi ég vilja eyða ævi minni á eyðieyju með 15 diskum af Greatest Hits með Limp Bizkit en Alfreði Þorsteinssyni enda löngum verið talinn leiðinlegasti maður í sögu mannkyns. Mikill skaði er nú þegar skeður og það er aðeins einn maður sem getur sparslað upp í sprungurnar í sál þessa fornfræga flokksins. Sá maður er að sjálfsögðu...


ÓMAR RAGNARSSON

Ómar hefur í gegnum tíðina verið óskabarn allrar þjóðarinnar og gamanvísur hans ættu að geta kveðið í kútinn alla mótspyrnu sem hægri menn eiga eftir að veita í kosningabaráttunni. Ómar þarf ekki annað en að hreyfa varirnar í sundur til að láta alla þá sem viðstaddir eru engjast um að hlátri og ein níðvísa í garð Gísla Marteins gæti gengið að kosningabaráttu hans dauðri. Ómar getur dansað og trallað lengur en Riverdanceflokkurinn á kókaíni auk þess sem að barnalög hans hafa innprentað í hug allrar íslensku þjóðarinnar að hann sé sá eini sem viti hvað hann syngur. Ómar Ragnarsson er verðugur kostur.


Ljóst er að ef flokkarnir mundu fara eftir þessum snilldarlegu hugmyndum mínum yrði hættunni af því að fá trúð sem borgarstjóra klárlega aflýst og í stað hans mundi koma landslið íslenskra skemmtikrafta og allir mundu hafa gaman af. Opnuð yrðu leikhús út um hvippinn og hvappinn þar sem upprennandi skemmtikraftar fengu færi á að sýna listir sínar, engum mundi leiðast að sitja fastur í umferðinni því að útvörpun borgarstjórnafunda ylli því að fólk óskaði þess að lenda á rauðu ljósi og lengja þar með bílferðinni og á menningarnótt þyrfti ekki einu sinni að ráða skemmtikrafta því að þeir sætu hvort eð er allir í borgarstjórn. Mín leið er sú eina rétta og ef ekki verður farið eftir þessu, þá eru viðkomandi flokkar skipaðir eintómum hálfvitum.

Að lokum ætla ég rétt að vona að enn leynist úti í hinum stóra heimi dyggir lesendur, annars eyddi ég þremur korterum af nóttinni í meira rugl en ég vil gera mér í hugarlund. Ég þakka öllum þeim sem lásu þessa grein til enda og vona að ég muni sjá mér fært um að henda inn færslum af og til í vetur. Og ef þið kommentið ekki neyðist ég til að slá ykkur með hafnaboltakylfu í hnakkann...

Abending

http://platzmo.blogspot.com er vist heitasta sidan i bænum i dag (skv. Her&nu og Hus og hibyli).

Ef það hefur einhvern tímann verið tilefni...

...til að vitna í hina stórgóðu diskóhljómsveit The Pointer Sisters, þá er það núna.


(The Pointer Sisters á góðri stundu í góðu glensi)

"I'm so excited and I just can't hide it
I'm about to lose control and I think I like it"

Farinn á Interrail, þið verðið að reyna að skemmta ykkur næsta mánuðinn án mín...

Rostungurinn veðjar á tónlist

Ég býð hér með lesendum í veðmál. Ég er tilbúinn til að veðja bjór á á að lagið Forever Lost með hljómsveitinni The Magic Numbers eigi eftir að slá í gegn á næstunni. Lagið hef ég gert aðgengilegt hérna.

Einhverjir þarna úti sem taka þessu veðmáli?

Yfirlýsing

Hér með lýsi ég því yfir að ég ætla ekki að kaupa neinar stórar verslunarkeðjur næstu sex mánuðina.

Magnaðir tónleikar

Já, ég fór á Antony & the Johnsons í gær og þeir voru magnaðir.
Já, ég tók í höndina á honum eftir tónleikana.
Já, ég átti spjall við hann eftir tónleikana.
Já, ég er ekki enn búinn að komast yfir það...

Nýr dagskrárliður

Hér með kynni ég nýjan dagskrárlið: Rostungurinn kemur með tónlistarskúbb.

Í þessum dagskrárlið hyggst ég vekja athygli á öllu því merkilega sem ég fatta þegar ég hlusta á tónlist, enda um auðugan garð að gresja til bloggfærslusköpunar. Enginn er óhultur, skögultennur Rostungsins hlífa engum, hvorki góðum né slæmum. Líta má á fyrri tónlistarskúbb sem ég hef skrifað sem upphitun fyrir þetta og ef ég hef ekkert betra að gera mun ég e.t.v. leita í gömlum færslum að gömlu skúbbi.

Hefst þá skúbbunin.

Skúbb 1: Lagið Float on með Modest Mouse fékk mikla útvarpsspilun á sínum tíma og töldu margir hana verðskuldaða. Lagið innihélt skemmtilegan takt sem þótti frumlegur og varð lagið því þokkalega vinsælt. Það sem hlustendur vissu hins vegar ekki var að taktinum úr laginu er stolið úr laginu Superstition með Stevie Wonder!

Skúbb 2: Það virðist vera fátt sem hljómsveitir á borð við Interpol og The Bravery eru að gera núna sem Joy Division gerði ekki fyrir 25 árum síðan!

Skúbbun lokið.

Jæja kæru lesendur. Sammála eða ósammála? Er ég skúrkur eða hetja? Tjáið ykkur í athugasemdakerfið og ég mun ákveða hvort þið fáið að synda með Rostungnum eða ég bíti ykkur.

Jæja

Umfjöllun um langalangafa hverra fleiri er á Wikipedia?

Heimskar auglýsingar

Þegar ég er í vinnunni er ég oft í þeirri aðstöðu að geta hlustað á útvarpið á meðan ég vinn. Verður þá oftast fyrir valinu annað hvort X-FM ellegar X-ið. Báðum þessum stöðvum er haldið uppi af sömu fjórum lögunum en það er önnur saga sem lesa má í næsta bindi. Ekki slaufu. Hohoho.

Nú er fimmaurabröndurunum lokið.

Allavega. Þegar ég er að hlusta á þessi sömu fjögur lög í mismunandi röð er iðulega skotið inn auglýsingum eins og gerist og gengur á öllum útvarpsstöðvum nema Rondo 87.7. Enn og aftur tekst meirihluta íslensks auglýsingaiðnaðar að sanna fyrir mér algjört vanhæfi sitt enda eru þær auglýsingar sem berast til eyrna manns mest megnis rusl. Ein auglýsing öðrum fremur hefur þó vakið athygli mína fyrir heimsku, en sú auglýsing er komin frá gæðamatsölustaðnum McDonald's þar sem ástríða er lögð í sérhvern hamborgara. Auglýsingin hljómar svo:
"McFlurry fæst aðeins á McDonald's"

Nú vantar mig einungis heimilisfang til að senda Nóbelsverðlaunin á. Hvaða fávita dettur annað í hug en að McFlurry fáist einungis á McDonald's? Er e.t.v. stór hópur fólks þarna úti í hinum stóra heimi sem verður rosalega hissa þegar það fer í aðrar ísbúðir, pantar sér McFlurry til þess eins að verða fyrir þeim gífurlegu vonbrigðum að komast svo að því að McFlurry fáist aðeins á McDonald's? Var svo gífurlega mikill þrýstingur búinn að myndast á forráðamenn McDonald's á Íslandi (Lyst ehf.) að þeir sáu sig tilneydda til að fara að útvarpa auglýsingu til að leiðrétta þennan misskilning? Voru starfsmenn ísbúða landsins búnir að fá nóg af samtölum á borð við:

Viðskiptavinur: Já ég ætla að fá einn McFlurry
Starfsmaður: Nei því miður fæst McFlurry einungis á McDonalds
V: Nei heyrðu mig nú, þá sleppi ég þessu bara
Og svo rýkur viðskiptavinurinn út...

og sendu McDonald's kvörtun? Ætti McDonald's ekki frekar að einbeita sér að því að það bjóði upp á fljótlegustu leið sem í boði er til að fá kransæðastíflu? Ég sé miklu frekar auglýsingar á borð við:
"McDonald's - Og kransæðarnar springa"
"McDonald's - Og þú hættir að geta hreyft þig"

Nei, bara svona pælingar vinnandi manns...

Góð mynd

Ef vel er að gáð má sjá sjarmatröllin Agnar Darra Lárusson og Sigurjón Norberg Kjærnested bregða fyrir á þessari mynd. Tókst þeim að troða sér í Moggann eftir sigur í ræðukeppni grunnskólanna í 10. bekk og eru þeir ennþá að komast inn á skemmtistaði í VIP röðum útaf því. Vil ég því hvetja alla til að grípa hraustlega utan um þá tvo næst þegar að þeir rekast á þá á förnum vegi og óska þeim til hamingju með árangurinn, þeir eiga það skilið.

(Ég fann s.s. þessa fyndnu mynd sem ég varð að koma á framfæri...)

Geri aðrir betur

Sextán þúsund kall fyrir að vera átta tíma í sólbaði í dag. Ekki hverjir sem eru sem gera svona góða díla. Ef þetta góða veður heldur áfram legg ég hins vegar til að síesta verði tekin upp á Íslandi, það er náttúrulega bara brandari að maður þurfi að leita í skugga sökum hita á Íslandi.

Svo held ég að það megi með sanni segja að frumraun DJ Fiaskó hafi verið succes. Þetta var allavega hilvíti mikið stuð og DJ parið Fiaskó og Súkkes er komið til að vera...

Söknuður

Ég saknaði ykkar allra (nema Darra því hann var með mér) á sérstakri Sagafilm forsýningu á Batman Begins. Bömmer fyrir ykkur...

Gaman

Ég er skemmtilega útitekinn. Útivinna über alles. Vorkenni þeim hressilega sem þurfa að hírast inni í allt sumar í e-i súrri vinnu.

Vinnubloggfærslur standa alltaf fyrir sínu, ég veit...

Ljúf uppgötvun

Það kvíslaðist um mig sæluhrollur í vinnunni í dag þegar ég áttaði mig á því að menn á borð við Dodda og Gretti væru að veiða og flaka fisk til að borga launin mín á sömu stundu og ég sat inni í upphituðum skúr í skjóli fyrir veðri og vindum og las sjálfsævisögu Bob Dylan.

Afrek dagsins

1. Fór upp í námsráðgjöf Háskóla Íslands áðan og talaði þar við námsráðgjafa, líklegast í fyrsta skipti á ævi minni. Á mig voru farnir að sækja bakþankar varðandi val mitt á næsta ári en eftir ágætt spjall við námsráðgjafann varð ég staðráðnari en nokkru sinni fyrr að skella mér í hátæknieðlisfræðina. Um leið og ég kom heim dreif ég mig svo í að skrá mig í hátæknieðlisfræðina næsta ár áður en mér snerist hugur og er vonandi að ég hafi ekki verið að gera einhver reginmistök með því. Þetta verður örugglega fínt.

2. Mætti sprækur upp í 12 tóna og eyddi 6500 kalli á innan við hálfri mínútu. Miði á Antony & the Johnsons á NASA 11. júlí sem ég hvet alla til að mæta á og fjárfesting í disknum I Am a Bird now. Ég er að botnfíla þetta sem og langflestir þeir sem ég hef bent á þetta. Virkilega gaman að detta niður á svona gott efni og ég tilnefni diskinn nýkeypta hiklaust sem disk ársins, allavega enn sem komið er, og ljóst er að stórár er í vændum tónlistarlega séð ef hann á eftir að verða toppaður.

Fyndið

Ég er að hlusta á Duran Duran. Ég tel ekki miklar líkur á því að ég fari á tónleikana með þeim...

Nýtt útlit

Bömmer ef þú ert að skoða þessa síðu í IE, virðist virka ágætlega á öllu öðru og ég er þreyttur og nenni ekki að vesenast meira í þessu.

Það var eitthvað meira sem ég ætlaði að segja en ég er búinn að gleyma því. Djúpt...

Svona fyrir þá sem vildu vita

Þá er þetta með bestu diskum sem gefnir hafa verið út í ár að mínu mati:



Antony and the Johnsons - I Am a Bird Now


Svíkur fáa...

Töffarar helgarinnar

Tveir menn hljóta að standa upp úr sem töffarar helgarinnar:

1. Þorgrímur Þráinsson, sem gjörsamlega átti Júbílantaballið á laugardagskvöld eins og sést vel á
þessari mynd.
Viðlíka töffari hefur ekki sést hér á landi lengur en elstu menn muna og ljóst er að í huga hvers nýstúdents kom upp draumur um að vera álíka svalur og hann á júbílantaballinu eftir 25 ár og í huga hverrar nýstúdínu kom upp draumur um að fá einn dans við hann um kvöldið. Á óvart kom þó að vatsnbyssan víðfræga var ekki með í för og fékk reykingafólk því að stunda iðju sína óáreitt um kvöldið, þó að vísu hafi komist sá kvittur á kreik að hann hafi rifið rettu úr munni veislugests, traðkað á henni og sagt "Svona gera menn ekki". Sem er að sjálfsögðu rétt.

2. Jói Fel

Kappinn sá um allar veitingar í útskriftarveislu minni og mistókst að slá feilnótu líkt og vanalega. Álíka kræsingar hef ég ekki séð síðan að ég var viðstaddur veislur Loðvíks XIV í Versölum á sínum tíma eða þegar ég var staddur í Babættes Gæstebud. Meistarinn var meira að segja svo stórmannlegur að lauma með í veisluföngin nokkrum pökkum af hinu glænýja hafrakexi Jóa Fel sem er víst að slá í gegn í Hagkaupum þessa dagana. Enn þann dag í dag er ég að gæða mér á þessu gæðakexi og skil ég fullkomlega þær vinsældir sem hafrakexið hans Jóa er að öðlast, álíka hafrakexkökur hafa líklegast aldrei verið töfraðar fram.

Annars er ég líklegast að fara að skila inn umsókn í HÍ á morgun, fresturinn til að benda mér á að gera e-ð flippað á næsta ári er alveg að renna út...

Þrjár staðreyndir, tvær afleiðingar og eitt sörpræs

Viðbjóóóóóóóóðslega góð:
1. Joe Cocker
2. Janis Joplin
3. Bjór

Afleiðigar:
1. Woodstock myndin var sjúklega nett
2. Kvöldið mitt var það líka, bjór + tónlist = JÁ

Eitt sörpræs:
1. Ég horfði á fótboltaleik og hafði gaman af. Auðvitað studdi ég Liverpool til að styðja sama lið og John, Paul, George og Ringo, jafnvel að maður fari að stunda það að leggja stuðning sinn á svona lið fyrst að það skilar svona góðum árangri. Auðvitað er það stuðningi mínum í kvöld að þakka að Liverpool vann, ef ég mundi halda svona einhverju áfram gætu það jafnvel orðið sigrar til frambúðar.

Annað sörpræs sem ég gleymdi:
1. Ég ákvað líklegast háskólanám á næsta ári undir áhrifum. Takmarki mínu tel ég mig því hafa náð þó að ekki hafi ég kastað upp á háskólanámið...
2. Og ég kastaði ekki upp í kvöld. Hins vegar gerði ákveðinn maður það sem ekki verður nafngreindur hér....


Ég er að fíla Woodstock. Alveg eru til e-r manneskjur á landinu sem ég væri til í að fórna til að hafa fengið að vera þarna. Og Joe Cocker og Janis Joplin eru viðbjóðslega góð...

Loksins

Held að mér hafi tekist það að vera sá síðasti til að skrifa bloggfærslu og lýsa því yfir hve mikill léttir það er að vera búinn í prófum. Já, það er ljúft.

Þá er það bara að fara að pæla í hvað maður fer að gera næsta haust...

Djöfull ég veit ekki enn

- eða hvað?

Lúxus

Aaa, ekkert sem jafnast á við hressa krakka á trampólíni með tilheyrandi öskrum í næsta nágrenni til að hjálpa manni við að halda einbeitingu svona undir blálokin á próflestrinum...

Eurovision

Djöfulsins tilberasmjör...

Yfirlýsing

Ég lýsi því hér með yfir að ég er ekki að fíl'etta...

Djöfull

Ástandið á mér núna fyrir þetta munnlega próf er álíka gáfulegt og að hafa skráð sig í pólska herinn 31. ágúst 1939...

Næturhúmor

Tímamót

Nýr kafli var skrifaður í skólagöngusöguna þegar ég lauk síðasta skriflega prófinu áðan. Ekki laust við að það marki nokkur tímamót enda einungis tvö munnleg kvikindi eftir. Það eru því 165 reglur, 76 skilgreiningar, 328 dæmi og einn maður sem eiga eftir að kljást fram á föstudag og nokkrar smásögur og ljóð sem berjast um athyglina við hið hámenningarlega Eurovision um helgina og síðan ekki söguna meir.

Nú man ég eftir því hvað orðið Evróvisjón fer alveg skuggalega í taugarnar á mér. Þetta orðskrípi kom alveg örugglega fyrst fram hjá Gísla Marteini fyrir nokkrum árum og virðist því miður ætla að skjóta rótum í málinu. Nú hef ég löngum verið talsmaður þess að fyrir erlend orð sem berast til landsins séu smíðuð ný orð en þetta er fyrir neðan allar hellur. Hvers lags fæðingarhálfvita þurfti til að búa til þetta orð (held að svarið við þeirri spurningu sé að umræddur hálfviti sé Gísli Marteinn) sem hvorki er fugl né fiskur? Nú er Eurovision augljóslega samsett úr Euro og vision og því skiljanlegt að minnst sé á Evrópu í nafni keppninnar. Hins vegar finn ég visjón hvergi í minni orðabók og ég held að jafnvel í Sjittorðabók Marðar Árnasonar megi heldur ekki finna það orð. Hins vegar taka erkifíflin sem útbreiða fagnaðarerindið um þetta orð ekkert tillit þess og í tíma og ótíma má heyra auglýstan "Nýja Evróvisjóndiskinn" og "Evróvisjóntilboð". Legg ég því til að fundið verði nýtt orð fyrir þessa keppni ellegar að hún verði kölluð Júróvísjón. Evróvísjón er álíka þjált í eyrum og sandpappír og gerir engum gott. Ég sting því upp á að keppnin verði héðan á frá kölluð Evrógaulið og að Gísli Marteinn verði kýldur í magann fyrir að vera á góðri leið með að koma Evróvisjón inn í tungumálið.

B-O-B-A

Mugison er ofmetinn

Núna veit ég...

...hvernig Ptólemeus leið í gröfinni þegar að sólmiðjukenningin kom fram. Hugmyndin um 12 tíma svefn var of góð til að geta staðist...

Vísindaleg niðurstaða

Löngum hefi ég velt vöngum yfir því hvernig sé að sofa í 12 tíma á meðan að á stúdentsprófum stendur. Nú veit ég það. Mæli með því eftir lestur undir tvö eðlisfræðipróf.

Tvífarar?

Þessi mynd minnir mig óstjórnlega á einhvern...

Tartaros

Bit tveggja ára leti er fast...

Meiri 80's tónlist

Þar sem að ég sé fram á að prófið verði sköll hef ég ákveðið að fara að hlusta á 80's tónlist eins og óður maður. Rakst ég á gamlan gullmola í gær, en það er lagið Tarzan Boy með Baltimora. Mæli ég eindregið með því lagi til að létta lund í prófatímanum og má finna það hérna.



Merkilegt nok þá er Baltimora ekki hljómsveit heldur listamannsnafn Jimmy McShane sem sjá má á myndinni hér fyrir ofan.

Emotional meltdown?

Að læra eðlisfræði nánast samfellt frá morgni langt fram á nótt. Finna 80's safndiska í geisladiskasafninu sínu. Blasta Kajagoogoo.

Lygar fjölmiðla

Sá dagur líður varla að ekki heyrist fréttir í fjölmiðlum um vaxandi offitu íslenskra barna. Svara er leitað við þeirri spurningu hvað valdi þessum vaxandi vanda og er hreyfingaleysi íslenskra barna oftast kennt um. Krakkar hangi inni og spili tölvuspil og fari ekki út úr húsi nema til þess eins að stíga upp í næsta bíl. Athuganir mínar síðustu daga benda hins vegar til þess að því miður er þetta ekki satt. Því miður fara íslenskir krakkar út ennþá að leika sér. Því miður segi ég, því undanfarna daga hefur verið ómögulegt að læra fyrir látum í krakkaskríl sem hefur komið sér fyrir rétt fyrir utan gluggann á herberginu mínu. Allan liðlangan daginn hamast þessi kvikindi með tilheyrandi öskrum og djöfulgangi og tók þó út fyrir allan þjófabálk í gær þegar að fimm stelpur, á að giska 10 ára gamlar, fóru í öskurkeppni. Fyrir utan gluggann minn. Eða svona nánast. Á meðan að ég var að berjast við að lemja jarðfræðiþekkingu inn í hausinn á mér í þessu sóðalega góða veðri sem var í gær var æstur krakkaskríll að skemmta sér á minn kostnað. Sjaldan hef ég bölvað námsefni jafnmikið og sjaldan bölvað nokkrum krökkum jafnmikið. Ég vil því endilega hvetja alla foreldra barna á aldrinum 3-16 ára sem lesa þessa færslu að gefa börnunum sínum leikjatölvu og sjónvarp, í það minnsta á meðan að ég er að læra fyrir stúdentspróf.

Einnig vil ég biðja ykkur kæru nágrannar ef þið eruð að lesa þetta að drullast til að banna börnunum ykkar að glamra á píanó klukkan átta á morgnana. Annað hvort er ég að reyna að sofa á þessum tíma eða að reyna að læra. Stanslaust píanóglamur á verkum sem ég er búinn að þjást við að hlusta á í nánast heilt ár hjálpar til við hvorugt. Og hættið líka að smíða. Eitt hamarshögg eða hljóð í vélsög á meðan að ég er að læra eðlisfræði um helgina og ég fer og rústa píanóinu ykkar með sleggju. Takk.

Jammmjammm, alltaf jafngaman í prófum...

Tónlist

Fátt jafnast á við það eftir margra tíma nánast samfelldan lestur á jarðfræði að taka sér smá hlé frá lærdóminum og rokka með Black Sabbath hátt stillt í nokkrar mínútur.

Djöfull

Nú væri gott að eiga klukku sem gæti stöðvað tímann...


Svo að maður vitni í sjálfan sig:"Tíminn er andstæðingur afreka" - Ásgeir, 2004

Eins og John Fogerty og félagar í CCR sungu:

"You know the night time
Is the right time..."

Þræðir Skúnksins liggja víða...

Hvern hefði grunað að jafnvel Laddi mundi falla fyrir eiturefnum Skúnksins?


Tékkið á lagi númer 11 á þessum disk. Svakalegt...

Jæja

Ekki nema bara hva, fimm stærðfræðipróf eftir. Og svo eitthvað meira...

Niðurstaða lesturs fyrir sögupróf

Djöfull var Jónas frá Hriflu mikill töffari!

Obbobbobb

http://www.mbl.is/mm/frettir/frett.html?nid=1135429;rss=1

Nú segi ég eins og Megas...

Afsakiði meðan að ég æli...

Loksins...

GAUARNIR! GAUARNIR!

Helgin

Fátt jafnast á við djammsögur á bloggum og hér kemur því nýr dagskrárliður: Helgin í hnotskurn.

Föstudagur:
Matarboð. Þakka Gunna Jó gott boð. Ekkert sem nokkur manneskja sem var ekki á svæðinu nennir að lesa um þannig að ég ætla að sleppa því að skrifa um það.
Afmæli hjá Hauki Abbador. Ekkert heldur sem nokkur nennir að lesa um sem ekki var á svæðinu.

Tónleikar. Loksins e-ð sem gaman er að lesa. Ég og Grettir ákváðum að skella okkur á útgáfutónleika hinnar kynngimögnuðu hljómsveitar Trabant á Nasa, enda kostaði miðinn skitnar 500 krónur í forsölu. Eins og venja er var upphitunarhljómsveit og eftir því sem mér skildist var hér ný stúlknahljómsveit á ferð. Ég og Grettir mættum á svæðið 23:30 og hlógum að þessu þangað til að Trabant byrjuðu e-ð eftir miðnætti. Þvílíku og öðru eins rusli hef ég sjaldan orðið vitni að. Fyrir þá sem misstu af þessu, sem ég reikna með að hafi verið blessunarlega margir, voru þetta s.s. þrjár stelpur uppi á sviði og ein iBook fartölva. Fúttið fólst s.s. í því að tækninördið í þríeykinu gekk að tölvunni að loknu hverju lagi og setti á næsta takt sem flestir hefðu getað búið til í Fruity Loops tónlistarforritinu stórskemmtilega á innan við fimm mínútum. Og svo voru þær þrjár uppi á sviði að öskra og stynja í hljóðnema og dilla sér við. Dilla er úrdáttur, réttara væri að segja að þær hefðu dansað uppi á sviði dansa eftir sömu höfunda og samið hafa fyrir J. Lo og Britney Spears. Þrautæfðar hreyfingar juku enn á fáránleikann á þessu öllu saman og til að toppa allt saman voru þær voðallega artí-fartí málaðar. Og allavega ein með hárkollu. Þvílíku og öðru eins ripoffi á Peaches og allt til Velvet Underground hafði ég heldur aldrei orðið vitni að. Besta lýsingin á þessu var e.t.v. artí-fartí Nylon. Óbjóður. Nema hvað, til að toppa þetta allt saman virtumst við Grettir vera þeir einu sem sáu í gegnum þessi nýju föt keisarans. Allt artí-fartí lið bæjarins (og að sjálfssögðu fleiri) var mætt á svæðið og það kunni sko að meta þessa frábæru hljómsveit. Gagnrýnin í lágmarki, blekkingin í hámarki. Hörmung og smán. Hið eina sem sefjaði reiðina var vissan um það að við vissum betur og gátum hlegið að þeim. Og alveg rosalega er ég viss um að Sirkus var mannlaus eða jafnvel lokaður á meðan að á tónleikunum stóð...

En jæja, eftir að þær tóku lokalagið sem við höfðum svo lengi beðið eftir, ekki vegna þess að við vorum spenntir að heyra lagið sjálft tók við biðin eftir Trabant. Þar sá ég líklegast mestu rokkstjörnudýrkun sem ég hef séð á íslenskri hljómsveit í langan tíma. Enda eiga þeir það líklegast skilið fremur en flestar aðrar íslenskar hljómsveitir. Góðir, mjög góðir, tónleikar. Og ég hef margoft eytt 500 kalli í meiri vitleysu en þetta.

Og svo var það bara Akureyri morguninn eftir, ætli það sé samt ekki efni í nýtt bindi helgarsögunnar. Forvitnilegt væri samt að fá skoðanir þeirra sem lesa þessa síðu og urðu vitni að upphitunni fyrir Trabant á þessu rugli. Erum við Grettir einir um þessa skoðun eða er kannski loksins kominn tími til að e-r stigi fram fyrir skjöldu og hrópaði "En hann er ekki í neinum fötum", líkt og H.C. Andersen skrifaði á sínum tíma?

Í tilefni Grímu(r)balls

"Kalli, ég skil við þig ef þú drullar þér ekki i þennan kjól og situr fyrir á myndum fyrir búningaleiguna mína..."

Málsbætur óminnishegrans

Í gærkvöldi átti ég ágætis stefnumót við óminnishegrann og fló hann með mér fram undir morgun. Á meðan á að fluginu stóð átti ég við hann prýðissamtal og eftir það samtal treysti ég mér til að setja fram eftirfarandi vísindalegu niðurstöður:

Dimissio verður 20. apríl. Þar munu allir 6. bekkingar drekka frá sér allt vit og rænu. Þar sem að drukkið verður frá sér allt vit skiptir engu máli hvað maður lærir þessa dagana, maður á eftir að vera búinn að gleyma því öllu þegar maður vaknar 21. apríl (eða 22. eins og sumir hafa lent í).

Þar sem að engu máli skiptir hvað maður lærir fyrir dimissio getur maður gert hvað sem manni sýnist fyrir dimmiteringu.

Þar sem maður getur gert allt sem manni sýnist er manni frjálst að leyfa óminnishegranum að læsa klóm sínum í mann og fljúga með mann á brott.

Þar sem að maður á hvort eð er eftir að leyfa óminnishegranum að læsa klóm sínum í mann er algjörlega ástæðulaust að streitast á móti því langt fram eftir öllu. Það veldur einungis samviskubiti sem spillir útsýninu á meðan að á flugi stendur.

Niðurstaða: Ég er að fara á grímuball og á söngkeppni á Akureyri og hvet alla til að gera slíkt hið sama með framangreindum atriðum úr samtali mínu við óminnishegrann. Stuð.

Ég bið svo alla þá sem ná ekki meiningunni á bakvið óminnishegrann afsökunar.

Hvítir hrafnar?

Það er á svona stundum þegar veðrið er jafnyndislegt úti að ég þakka Guði fyrir að búa á Íslandi í stað þess að vera staðsettur aðeins sunnar á hnettinum. Snjór í apríl er alltaf jafnfrábær og ekkert veit ég meira gleðiefni en að þurfa að draga vetrarúlpuna aftur út úr fataskápnum eftir að maður er kominn í sumarjakkann.

Takk fyrir mig

Síðasta Heimis færslan í bili

Heimir Pálsson hefur löngum verið þekktur fyrir að skrifa afspyrnulélegar kennslubækur í íslensku. Færri vita hins vegar að hann er einnig liðtækur stjarneðlisfræðingur eins og eftirfarandi mynd sýnir:

Þversögn

Og sumir sóuðu æsku
sinni í nám á meðan
aðrir vörðu henni í vín.

(Tómas Guðmundsson)

Og enn aðrir nóttum
í að lesa íslenskubækur.

(Ásgeir Birkisson)

Snorri Sturluson

Þegar að maður á að vera að læra undir íslenskupróf fer maður að gera...

Stopp. Þessi inngangur er þreyttur! Byrjum aftur...

Ég var að leita að e-u efni um Snorra Sturluson á netinu sem gæti gagnast mér í próflestrinum. Rakst ég þá á ansi merkilega síðu en það var heimasíða kennara í Fjölbrautaskóla Vesturlands á Akranesi. Jæja, þarna er e-r glósur um Snorra, en það sem vakti helst athygli mína var eftirfarandi mynd:

Nú veit ég ekki með ykkur lesendur góðir, en ég hafði ekki alveg ímyndað mér Snorra Sturluson á þennan veg...

Elvis Presley

Sennilega eru fáir tónlistarmenn sem eiga lög sem passa við jafnmörg tækifæri og Elvis Presley...

Djúpar pælingar, mjög djúpar pælingar

Íslenskupróf fá mann til að hugsa djúpt, mjög djúpt. T.d. áðan var ég að lesa Lestrarkver og ákvað að fá mér yfir því Marsstykki sem keypt var í e-i utanlandsferð hjá fjölskyldumeðlim. Um leið og ég beit í gegnum súkkulaðið fór ég að pæla. Nú vil ég benda fólki á meðfylgjandi mynd:

Sko. Eins og flestir þeir sem bragðað hafa Marssúkkulaði (eins og ég geri ráð fyrir að flestir þeir sem lesa þetta hafi gert) er Mars samsett af þremur mismunandi birtingaformum sykurs. Utan um allt er súkkulaðihjúpur, og þegar honum lýkur tekur við karamella. Gott og vel. Hvað í andskotanum er þetta samt sem er fyrir neðan karamelluna? Frauð? Deig? Kítti? Ber þetta e-ð nafn? Úr hverju er þetta?

Og afhverju hefur ekki risið upp alþjóðleg hreyfing sem krefst þess af Mars-M&M að upplýsa hvað þetta er? Og afhverju hélt ég ekki frekar áfram að lesa í íslensku í staðinn fyrir að pæla í þessu?

Velkominn heim!

Í tilefni af heimkomu heimsmeistarans fyrrverandi Bobby Fischer býður bandaríska sendiráðið á Íslandi, Laufásvegi, gestum og gangandi í heljarinnar heimkomuhátíð í kvöld. Boðið verður upp á léttar veitingar, Budweiser bjór, Ben&Jerry's ís, McDonalds og Cherry Cola. Lifandi tónlist, uppistand og hver veit nema Fischer sjálfur mæti á svæðið og taki létt fjöltefli.

Bandaríska sendiráðið - sér um sína!

Eurovision

Alveg er ég viss um að við eigum eftir að vinna þetta í ár. Heyrði í fréttunum í gær að okkur sé spáð sigri á vinsælli áhugamannasíðu um keppnina, það eitt tryggir okkur sigur!

Vinsamlegast athugið

Ekki halda nein ammæli dagana 28. júlí til 27. ágúst. Ég verð úti og þætti mjög leitt að komast ekki.

Nýtt útlit

Þar sem ég hef ekkert betra við tímann að gera núna ákvað ég að eyða honum í að setja nýtt útlit upp á þessa síðu. Þeim sem líkar vel við breytingarnar mega þakka Heimi Pálssyni fyrir að gefa mér tíma til að gera þetta, án þess að bækur hans hengu yfir mér líkt og sverðið yfir Damokleusi forðum hefði ég án efa nýtt tímann í eitthvað nytsamlegra.

Annars er það bara djamm á morgun. Síðan mun lestur fyrir stúdenstsprófið í íslensku gleypa sálu mína.

Biðraðir

Biðraðamenning Íslendinga er magnað fyrirbæri. Til dæmis voru fleiri í röðinni fyrir utan Prikið síðustu nótt en inni á því.

Löngu tímabærar á tenglalistanum hafa verið gerðar upp á síðkastið. Aldrei að vita nema að enn fleiri verði gerðar á næstunni. Ef ég nenni. Alveg eins og Helgi Björns söng í den.

Dyravörður deyr (e. Death of a security guard)

Endurgerð leikrits Arthurs Miller eftir Á. Birkisson.

Staður: Röðin á prikinu
Tími: Aðfaranótt laugardagsins 19. mars 2005

Ásgeir labbar niður Laugaveginn ásamt Einari Búa. Á röðinni á Prikið hittir hann hluta Grammanna og ákveður að hitta hinn hluta Heimsborgaranna þar inni. Einar Búi hafði fyrr um kvöldið þurft að bíta í það súra epli að skilríki hans virkuðu ekki á staðinn og ákveður að halda heim á leið. Framhaldið varð eftirfarandi:

E-r stelpur sem Ásgeir hefur ekki hugmynd um hverjar eru: "Hæ, varst þú ekki gaurinn í idolinu í gærkvöldi?"
Ásgeir: "Ha?"
E-r S:"Jújú, ég er viss um að ég sá þig í sjónvarpinu í gær. Þú ert gaurinn úr Idolinu"
Á:"Jájá, ég var í Idolinu í gær"
E-r gaurar fyrir aftan:"Hva, heldurðu bara að þú fáir að skjótast inn í röðina því að þú ert e-r sjónvarpsstjarna (alls ekki sagt í neinum illum tón)
Á:"Já, það er tekið út með sældinni að vera Kalli Bjarni"
Dyravörður:"Jæja, þið næst inn. Má ég sjá skilríki?"

Hópurinn réttir dyraverðinum skilríki sín. Tíminn líður. Skilríki Ásgeirs eru skoðuð gaumgæfilega.

Dyravörður:"Heyrðu, það er annar strákur búinn að nota þessi skilríki í kvöld. Annað hvort fer ég upp og næ í hann og við gerum e-ð vesen úr þessu eða þú sleppir því að koma inn í kvöld."


Ásgeir skallar dyravörð og labbar inn.

Á:"Reyndu að gera e-ð vesen úr þessu!"

Síðustu tvær línurnar voru stórýktar. Annað er skrifað eftir besta minni.

Gærkvöldið kenndi mér eftirfarandi:

Það borgar sig kannski ekki að vera með skilríki frá þeim sem þú djammar oftast með. Sérstaklega ekki þegar að þrír menn sem djamma oftast saman treysta á ein skilríki.

Dyraverðir eru skussar.

Eftir að ég snéri frá Prikinu rakst á Fúsa. Honum hafði verið kastað út því hann mundi ekki eftir í hvaða stjörnumerki hann átti að vera skv. skilríkjunum. Ef við samtvinnum þennan punkt við punktinn að ofan fáum við merkilega niðurstöðu. Þar sem dyraverðir eru skussar er nánast líffræðilega ómögulegt að þeir geti lagt á minnið hvaða stjörnumerki á við hvaða dag. Það að ætla að þeir geti munað svona flókna hluti er einfaldlega kjánalegt og því er ástæðulaust að vera tekinn á e-u svona. Það eitt að svara þeim strax veldur skammhlaupi í heila þeirra og kemur í veg fyrir svona.

Ef maður er búinn að eiga súra daga borgar sig ekki að gera tilraunastarfsemi við kaup á hvítvíni. Ratatoskr og gangaslagurinn, toppurinn á hatri almættisins á mér þessa dagana, gaf mér ástæðu til að ætla að vínið sem ég keypti mér væri ekki það besta og kom það frekar mikið á daginn.

Hins vegar nýtti ég mér þekkingu mína á líkindareikningi og ályktaði sem svo að svona óheppni gæti ekki haldið áfram endalaust. Þegar ég hafði lokið við að fara í Ríkið áðan í Kringlunni ákvað ég að gefa skít í líkindaguðina og kaupa mér lottómiða. Til að kóróna allt saman, happaþrennu líka. Happaþrennan skilaði mér í 100 króna tapi. Ég hlýt að vinna í lottóinu í kvöld...

Textapæling

Í tilefni af því að Megas á afmæli í ár hyggst ég endurskrifa viðlag lagsins Þótt þú gleymir Guði í samræmi við núverandi tíðaranda.

Þótt þú gleymir Heimi Pálssyni
Þá gleymir Heimir Pálsson ekki þér

Hins vegar þá gleymir þú
Öllu sem þú varst búin(n) að lesa
Um leið og þú lokar bókinni


Hygg ég að þetta verði sumarsmellurinn 2005, og slái jafnvel Macarena við í vinsældum.

Merkisatburður

Staður: Kaldársel
Tilgangur: Skoða stjörnur
Veður: Kalt
Afleiðingar: Fætur teknir af við mjöðm vegna kalsára.

Fiðluballið

Fór fram í gær. Sjúk stemmning. Hófst á því að franski sjómaðurinn Roisant náði í mig og Gretti. Stefnan var sett á Domino's. Inn á Domino's löbbuðu þrír menn, tveir í smóking og einn í flippuðum, röndótt buxuðum sjakett. Þrír menn fengu ekki afgreiðslu. Líklegast hefur afgreiðslufólkið talið að hér væru vitleysingar á ferð og ætluðu ekki að láta ná sér á sama bragði og afgreiðslufólkið á Grillinu í Englum alheimsins. Endaði þó seint og um síðir að við fengum mat okkar afhendan og brunuðum með hann til móts við bekkjarfélaga okkar.

Áður en farið var inn á Domino's kviknaði sú hugmynd í kollinum á mér hvílík skemmtun það væri að fara þangað inn í þessum klæðnaði og ganga með staf í hönd. Þegar inn væri komið skyldi síðan labbað upp að afgreiðsluborðinu og beðið eftir starfsmanni. Þegar starfsmaðurinn væri kominn skyldi stafnum lyft upp og honum potað í starfsmanninn. Ekkert meira. Bara pota í almúgann. Slíka hrifningu vakti þessi hugmynd hjá mér að ég viðraði hana við einhverja sem ég talaði við á ballinu. Vakti þessi hugmynd líka hrifningu hjá þeim og víst er að þessi hugmynd verður ekki látin óhreyfð. Stefnt er að hópferð á Lækjartorg þar sem potað verður í fólk með staf.

Rétt er að taka það fram að pizzuhugmyndin var ekki mín. Ég stakk frekar upp á snittum en einn heimsborgari má sín lítils á móti átta plebbum. Lýðræðið er rotnandi hræ. Eftir að matar hafði verið neytt var haldin hópferð nemenda Eðlisfræðideildar I til að skila heimadæmum í heimahús. Mæltist þetta einstaklega vel fyrir hjá Birgi (ég geri fastlega ráð fyrir því að allir sem lesa þetta viti um hvern er rætt) og höfðu allir sem málið snerti mikið gaman af. Eftir það var haldið niður í Iðnó.

Sjálft fiðluballið var skemmtun frábær. Með fullt danskort og nóg af frjálsum dönsum voru sólar lakkskónna spændir upp og er mál flestra, þ.á.m. mitt, að sjaldan hafi ball verið jafnskemmtilegt. Eftir ballið var gengið fylktu liði kringum Tjörnina þessa stjörnubjörtu nótt og naut ég þar samfylgdar Maddýjar. Vegfarendur voru það heppnir að vera veifað af okkur (háaðalsveifi, jafnvel konunga- og drottningaveifi) og víst er að þegar stafapotshugmyndin verður framkvæmd verður þetta hluti af henni. Eftir ballið var svo haldið á Hressó, lent í hrókasamræðum við Línu og síðan haldið heim á leið.

Frábært kvöld sem náði nýjum hæðum þegar mér tókst að sofa yfir mig í morgun.

Páfi var einn í tölvulandi

Páfi, páfi, já hann páfi tölvukall...

Áskorun

Hér með skora ég á e-n flippaðan strák í 6. bekk. Áskorunin felst í því að í stað þess að dansa á fiðluballinu á morgun á viðkomandi að spila á lüftgítar allan tímann, því eins og allir vita þá dansa strákar ekki.

Verðlaunum heitið.

---

Uppfærsla: Nú rétt í þessu (02:11) var Darri að stinga upp á að í stað lüftgítars skyldi leikið á lüftfiðlu. Tek ég athugasamd hans til greina og breyti áskoruninni hér með.

Ójá

I.K.Dairo er svakalegur tónlistarmaður, helsta stjarna juju tónlistarinnar í Nígeríu á 7. áratugnum og eini afríski tónlistarmaðurinn sem hlaut MBE orðu. I.K.Dairo er enn þann dag mest metni tónlistarmaður í sögu Nígeríu, en þrátt fyrir að hafa tekið sér hlé frá tónlistarsköpun á áttunda áratugnum kom hann fílefldur til leiks á þeim 10. og skemmti löndum sínum allt til dauðadags 1996. Því miður get ég ekki boðið ykkur lesendur góðir upp á tóndæmi, en ljóst er að öllum árum verður róið í þeim tilgangi að nálgast disk með honum fyrir næsta Heimsborgarafund.

Fiðluballið nálgast óðfluga...

...skýrt merki um að maður sé að klára MR. Kæru 6. bekkingar, ég býð ykkar velkomna á grafarbakkann. Næsta stopp: Elliheimilið Grund.

Þessi færsla er samin undir áhrifum All of My Love með Led Zeppelin af plötunni In through the outdoor, sem var einmitt þeirra síðasta plata með John Bonham innan borðs. Ætli þetta segi manni ekki bara að allt taki e-n tímann enda?

Linkalisti uppfærður

Loksins kom maður þessu í verk, þeim sem vilja kvarta er bent á næsta þjónustuborð (eða kommentakerfi). Annars er það helst að frétta að það er ekkert að frétta.

Kvöldhugleiðing

More Than This með Bryan Ferry og félögum í Roxy Music er yndislegt lag.

Bloggleysi síðustu daga

Er alfarið leti um að kenna. Hins vegar er ein saga sem ég hef viljað segja allt frá því á laugardaginn, en þá bar það helst til tíðinda að Villa Skúnkulaði tókst að vera fyndinn. Alvöru fyndinn, ekki bara vandræðalegþögn fyndinn. Varð ég fyrstur manna meðal gesta hjá Jóni Bjarna til að kveikja á hvað hafði gerst, og þegar ég mælti hin fleygu orð: "Villi, þú varst fyndinn" misstu flestir viðstaddir hökuna niður í gólfið. Einn maður missti þó ekki hökuna niður í gólfið, gestgjafinn sjálfur, þar sem að hann var vant við látinn og missti því af þessum einstaka atburði. Hef ég af þessu tilefni bætt inn nýrri málsgrein í ímynduðu skáldsöguna mina um Skúnkulaðið sem væntanleg er á markað í næsta lífi:
"Og í þetta eina augnablik var Skúnkulaðið fyndið. Skömmu síðar var allt komið í samt horf."

Síðan er víst að ég verð í sjónvarpinu í kvöld að draga í undanúrslit í Gettu Betur, og ég veit það jafnilla og þið afhverju ég er að skrifa um það hérna...

Jæja, best að drífa sig í förðun.

Um Tjarnarhringurinn

Einhvern tímann þegar ég hef nægan tíma ætla ég að útlista ítarlega skoðunum mínum á þessu fyrirbæri sem Tjarnarhringurinn er. Í bili ætla ég hins að láta mér nægja að segja frá afrekum dagsins:

Bæting um tæpa eina og hálfa mínútu frá því síðast.

Hækkun á einkunn um einn og hálfan.

Yfirlið.

Þeim snillingi sem datt í hug að hrúga niður bekkjum við endastöðina á hringnum er hér með boðið í afmælið mitt. Án bekkjarins lægi ég líklega á botninum á tjörninni núna.

Hlaup orsaka minnisleysi og kenni ég því Tjarnarhringnum í dag alfarið um öll afglöp sem ég á hugsanlega eftir að framkvæma í væntanlegum prófum.

Þess virði? Dæmi hver fyrir sig...

Hitt og þetta

Þar sem að ég nenni ekki að skrifa samfelldan texta verður bloggað í punktum í þessari færslu.

Endurbætur á Cösu urðu að heilmiklu verki sem rændu mann heilbrigði.

Melódjammið heppnaðist frábærlega. Smá skemmdir að vísu en það reddast. Vonandi. Þeim sem hafa ekki hugmynd um hvað ég er að tala er vinsamlegast bent á að gleyma þessum punkti.

Frábært djamm, ekki jafnfrábær vinna að sama skapi daginn eftir. Það að ætla sér að vinna upp nám í tölvufræði í vinnunni eftir lítinn svefn nóttina áður ráðlegg ég engum.

Fyrirlestur sem ég átti að flytja heppnaðist víst frábærlega er mér sagt. Ég var ekki viðstaddur flutninginn svo að allir brandarar dóu víst í fæðingu, ef þeir hefðu komið með hefði verið um annað Gettysburgarávarp að ræða...

Gagnrýni á háskólakynningar:

Verkfræðikynningin: Góð kynning, blés lífi í eld verkfræðiáhuga MR-inga

Læknisfræðikynningin: Ekki alveg jafn góð. Mjög ekki alveg...

Félagsvísindakynningin: Löglega afsakaður

Ætli stefnan verði ekki tekinn á verkfræðina á næsta ári úr þessu...

Góður Ratatoskr í dag, við ákváðum að hafa smá spennu í þessu til að byrja með en rétt eins og Fönix forðum daga snérum við fílefldir til leiks á ný...

Skítlegt eðli virðist vera innrætt í fleiri forseta en forseta Lýðveldisins...

Norðurljós

Nú rétt í þessu urðum við Skunkurinn vitni að mjög flottum norðurljósum, þeim flottustu í langan tíma.

Magnað.

Maður er svo flippaður...

Eins gott að jarðfræðiguðirnir ljósti mig þekkingareldingu í nótt, annars munu spretta úr höfði mínu fullskapaðar heimatilbúnar kenningar á prófinu á morgun líkt og Aþena gerði hér forðum úr höfði Seifs.

Óminnishegri!

Læstu klóm þínum í mig og fljúgðu með mig inn í nóttina.


Eitthvað þessu líkt hefði ég viljað hrópa áðan. Í stað þess sit ég klukkan tvö að nóttu og reyni að tjasla saman verkbók í eðlisfræði. Nick Drake er vel við hæfi á svona stundu...

Úr dönsku hefti um líkindareikning:

Fiasko!

Pólitískt blogg

Sat áðan fund með menntamálaráðherra ásamt kennurum Menntaskólans, fulltrúum nemendafélaganna og öðrum góðum gestum. Nú má hverjum og einum það fullljóst vera að önnur eins firra og að stytta framhaldsskólann hefur ekki borist til eyrna mér síðan að ég frétti að Bakkabræður ætluðu sér að bera inn ljós í húfum sínum. Þorgerður Katrín minnti mig á lélegan Sólbjartsræðumann sem samþykkti fyrir mistök að mæla með fyrirfram töpuðum málsstað, þrástagaðist á sömu punktunum sem að fundarmenn gleyptu að sjálfssögðu ekki við og vitnaði ótt og títt í álit ónafngreindra sérfræðinga, en jafnvel hinir slökustu Sólbjartsræðumenn hafa þó vit á því að skálda upp e-r nöfn á þá. Þorgerður átti ekki roð í fundarmenn þegar kom að spurningunum sem brunnu á vörum allra og uppskar fyrir vikið verðskuldað fliss (sem að hún reyndi að snúa gegn kennurunum, en þau orð sem engan þunga bera ná ekki í gegnum þykkan varnarskjöld fundarmanna). Það hljóta að teljast nýmæli ef að trúðar ætla sér að stjórna menntakerfi heillar þjóðar.

Þau rök sem Þorgerður kom með voru í flestan stað mjög hæpin og ljóst er að aðaltilgangur styttingarinnar hlýtur að vera að lækka útgjöld ríkissin til menntamála, nokkuð sem ríkisstjórn Íslands ætti að skammast sín fyrir nú í upphafi 21. aldarinnar. Allt annað virðist vera framsett til að slá ryki í augu gagnrýnenda, en þegar rykstorminn hefur lægt hljóta flestir að sjá í gegnum blekkinguna. Ef augu mín voru opin fyrir fundinn þá eru þau opnari en landamæri Bandaríkjanna á 19. öld núna, og fullvíst að enginn þeirra sem láta sig málið varða ætla að sitja auðum höndum á næstunni. Eflaust gæti ég skrifað mun lengri færslu um þetta mál, en krefjandi stærðfræðipróf á morgun kallar (en að sögn ráðherra er stærðfræðikennslan á menntaskólastigi víst fyrst og fremst upprifjun á grunnskólastærðfræðinnni) og ég ætla að njóta þess að geta stundað krefjandi nám á framhaldsskólastigi á meðan að það stendur enn til boða. "Tími aðgerðanna er runninn upp" sagði Lenín,"Við höfum ekkert að óttast nema óttann sjálfan" sagði Roosevelt og "I'm so proud of it i put my name on it" sagði George Forman. Þessi síðasta tilvitnun átti alls ekki heima þarna. Aðgerðir ráðherra eiga að sama skapi alls ekki heima í upplýstu þjóðfélagi á 21. öldinni. Ég vil því að endingu klykkja út með hinum frægu orðum Caesars sem eiga jafnvel við nú í dag og þau áttu við í Rómaveldi til forna, auk þess sem ég bið lesendur vel að lifa og taka þátt í þeim aðgerðum sem framundan eru. En eins og Caesar sagði:
Þorgerður Katrín - Þú söks!

Merkisatburðarfrásögn í tilefni söguprófs

7. febrúar 2005 verður lengi minnst í fyrirtækjasögu Íslands en þá stofnaði Vilhjálmur "Skunkur" Þórarinsson fyrirtækið Svik & Prettir ehf.

Var það Vilhjálms fyrsta verk sem forstjóri fyrirtækisins að víkjast undan að veita námsmanni við Menntaskólann í Reykjavík, Ásgeiri að nafni, bjór á barnum (hvaða bar var reyndar ótilgreint), en loforð þess efnis hafði hann gefið í færslu á heimasíðu fyrirtækisins, http://blog.central.is/alvar, en síða þessi var einnig þekkt fyrir ýmiss konar kreditkortabrask, sukk og svínerí. Orðrétt á heimasíðunni stóð:

"Tippaði í lengjunni áðan. Lagði vel undir. Ef Liverpool vinnur (sem ég efast ekki um), Tottenham vinnur (Haukur, það er eins gott að þínir menn taki þetta) og ef Arsenal vinnur þá vinn ég 11000 kall. Ef þetta gerist þá heiti ég hverjum þeim sem skráir sig fyrstur í gestabókina einum bjór á barnum þegar ég djamma með þeim einstaklingi næst."

Ásgeir, verandi mesti áhugamaður um fótbolta á landinu að Valla sport einum undanskildum, brá undir sér betri fætinum og heimsóttu heimasíðu íslensku Barbarasamtakanna, fotbolti.net, og þar mátti m.a. annars finna eftirfarandi úrslit í leikjum er fram fóru 5. febrúar, eða tveimur dögum fyrir stofnun fyrirtækisins:

Liverpool 3 - 1 Fulham

Tottenham 3 - 1 Portsmouth

Aston Villa 1 - 3 Arsenal
Almannarómur var á einu máli. Ljóst var að Skunkurinn ætlaði sér stóra kökusneið af undirheimum Reykjavíkur og því reið mikið á að tilraunir hans yrðu kæfðar í fæðingu. Tók höfundur þessarar færslu sig því til og beindi kastljósi sínu að glæpamálinu, ekki einungis í von um að það yrði upplýst heldur einnig til að vera öðrum sakleysingjum sem enn trúðu á hið góða í heiminum víti til varnaðar. Eina leiðin fyrir Skunkinn til að komast aftur á hina beinu braut hreinnar samvisku, siðferðiskenndar og hófsams lífernis var að gefa Ásgeiri þann bjór er hann fyrir löngu hafði lofað honum, ellegar mátti ljóst vera að Skunknum biði aðeins þjáning, fyrst í hinum veraldlega heimi en síðan eilífðardvöl í Hreinsunareldinum.

Og þá var það bara spurningin, hvað ætlaði Skunkurinn sér að gera?

Fylgist spennt með á Rostungnum...

Afreksmaðurinn Ásgeir

Í dag er ég búinn að afreka þetta:

Vaknaði klukkan fjögur í morgun

Fékk mér tvær skálar af Kellogs Special K

Hljóp þrjá kílómetra

Og ég er á leiðinni í sund núna

Já, það má sko með sanni segja að morgunstund gefi gull í mund!

Vísindaleg tilraun

Í gær framkvæmdi ég vísindalega tilraun.

Niðurstaða: Það er hægt að fara niður í bæ um helgar og vera á bíl á sama tíma. Merkilegt...

Skamm skamm

Þeir afturhaldskapítalistatittir sem reynt hafa að draga Tímann og vatnið niður í svaðið ættu að skammast sín. Hið sama reikna ég með að gildi um þá sem reynt hafa að gera lítið úr verkum Þórbergs Þórðarsonar, í það minnsta byrja Bréfin til Láru hressilega...

Skúbb ársins

Sem ég var að hlusta á annan hluta annars píanókonsert Rachmaniovs sló það mig að lagið All by myself sem Celine Dion gerði frægt hér um árið er einungis poppuð útgáfa á verki Rachmaninovs. Hluta úr konsertnum má finna hérna, en heyra má undir lok þessa brots hluta af því sem sem stolið var.

Já, það má með sanni segja að heimurinn hafi orðið betri staður til að búa í við þessa uppgötvun...

Ég væri farinn að sofa...

... ef Funeral með Arcade Fire væri ekki svona suddalega góður diskur...

Tónlistargetraun

Inspirations have I none - just to touch the flaming dove
All I have is my love of love - and love is not loving

Gott lag af góðum diski...

Sideways

Ég fór í bíó á laugardaginn.

Upphaflega hugmyndin var að enda færsluna hérna. Það hefði verið einum of.

En já, Sideways reyndist vera besta mynd sem ég hef séð á árinu. Nú er mér það fullljóst að á öðru hvoru bloggi þessa dagana er verið að lofsyngja þessa mynd svo að ég ætla að sleppa því, læt nægja að veita henni full meðmæli mín. Það sem ég vildi hins vegar sagt hafa er að aldrei framar verða Merlot vín lögð inn fyrir varir mínar eftir þá kostulegu útreið sem þau fengu í myndinni. Það er ljóst að Heimsborgararnir kunna örugglega að meta þessa mynd, allavega er víst að ónefndur kennari í MR kann að meta þessa mynd...

Píanókonsertar Rachmaninovs eru líka góðir. Sjóðheitar fréttir alveg ég veit, en oft er góð vísa of sjaldan kveðin. Hið sama á við um Elliot Smith. Og Bowie. Og Dylan. Ég hef oft velkst í vafa um hvort að hinir svokölluðu SACD (og nú hætta alveg örugglega einhverjir að lesa, en þeir sem héldu áfram komast að nokkru merkilegu) séu virkilega þess virði að kaupa, hvort að virkilega heyrist einhver munur á þeim og venjulegum diskum. Svarið er já. Þegar ég hlustaði á Simple Twist of Fate af Blood on the Tracks með Dylan í þessari SACD útgáfu sem ég var að fjárfesta í tók ég í fyrsta skipti eftir virkilegum mun. Þetta er einfaldlega besta upptaka af lagi sem ég hef heyrt. Nokkurn tímann. Sem er frábært.

Tónlistarmaður færslunnar: Bob Dylan.
Diskur færslunnar: Blood on the Tracks (1975)
Lag færslunnar: Simple Twist of Fate

Frábær dagur

Fyrst útsala í Skífunni og svo kemur sendingin frá Amazon. 13 diskum ríkari mun maður hlusta á tónlist á næstunni...

Norðurljós

Það eiga víst að vera einhver svakaleg norðurljós í nótt. Held að ég skelli mér út og kíki.

Ég sé það núna að þessi færsla er frekar súr...

Bloggað í punktum

Framúrskarandigeldingaberg stendur enn á gömlum merg svo að maður vitni í skáldið.

Heimsborgarakvöldið var mjög vel heppnað, elduð var dýrindis nautasteik og skálað fyrir Davíð Þorsteins.

Ónefndum aðila tókst að deyja á Pravda. Það var fyndið.

Mér tókst að elda góðan mat tvö kvöld í röð

Ég er að hlusta á Sverri Stormsker.

Ég er ekki lengur að hlusta á Sverri Stormsker

Hæfileiki minn til að skrifa samfelldan texta virðist ekki vera vaknaður ennþá.

Breyting til batnaðar

Það virðist ganga frábærlega að taka upp heilbrigðari svefnvenjur nú á nýju ári...

Heimsborgarinn rumskar við sér

Ég vil vekja athygli á að heimsborgarinn sjálfur hefur hafist handa við skrif á nýjan leik. Skrif hans má finna á http://heimsborgarinn.blogspot.com og er mælst til þess að allir kynni sér þann fróðleik sem hann býr yfir.